Një aksident i rëndë në punë i ka marrë jetën një 20-vjeçari shqiptar në Valtopina të Italisë.
Rogert Ajdini, i cili banonte në Trevi, ishte i angazhuar në asfaltimin e rrugës Santa Cristina, ku raportohet se u shtyp nga një rul asfalti që po përdorte. Dyshohet se makina e rëndë është përmbysur, ndonëse shkaqet e saktë mbeten ende të paqarta.
Siç raportojnë mediat italiane, punëtorët e tjerë njoftuan menjëherë shërbimet e emergjencës, por plagët e rënda rezultuan fatale për të riun. Në vendngjarje mbërritën ekipe të ambulancës, zjarrfikësit dhe helikopteri i shpëtimit, por përpjekjet e tyre për ta shpëtuar Ajdinin ishin të pasuksesshme.
Karabinierët dhe autoritetet lokale kanë nisur hetimet për të përcaktuar saktësisht rrethanat që sollën përmbysjen fatale të mjetit të rëndë.
Punimet për rikonstruksionin e rrugës Santa Cristina ishin marrë përsipër nga një kompani ndërtimi e specializuar, me porosi të Bashkisë së Valtopinës.
Lajmi i humbjes së Ajdinit ka tronditur komunitetin. Kryebashkiaku i Valtopinës, Gabriele Coccia, ka shprehur ngushëllimet për familjen, duke e quajtur ndarjen e të riut “një tragjedi të rëndë”.
Hetimet mbi ngjarjen mbeten të hapura në pritje të zbardhjes së plotë të shkaqeve të aksidentit.
