Komisioni i Mbrojtjes Civile të Qarkut Shkodër ka vlerësuar situatën e zjarreve gjatë sezonit veror 2026, si dhe nevojën për koordinim dhe reagim në kohë për përballimin e emergjencave gjatë dimrit.
Në Prefekturën e Shkodrës është zhvilluar mbledhja e Komisionit të Mbrojtjes Civile të Qarkut, ku në fokus kanë qenë analiza e situatës së zjarreve gjatë sezonit veror 2026 dhe masat që duhen marrë për përballimin e emergjencave gjatë sezonit dimëror.
Gjatë mbledhjes është theksuar rëndësia e përgatitjes paraprake, koordinimit ndërmjet institucioneve dhe reagimit në kohë për të përballuar situatat emergjente.
Një tjetër çështje e vënë në dukje ishte nevoja për përcaktimin e qartë të përgjegjësive të çdo institucioni, shkëmbimin e vazhdueshëm të informacionit dhe vënien në dispozicion të kapaciteteve operacionale për përballimin e situatave të mundshme.
Sipas Prefekturës së Shkodrës, megjithëse emergjencat nuk mund të parandalohen në çdo rast, përgatitja dhe bashkëpunimi ndërinstitucional janë thelbësore për të minimizuar pasojat e tyre dhe për të garantuar sigurinë e jetës, pronës dhe komuniteteve.
