Një sherr mes disa të rinjve në lagjen nr. 11 të Korçës u shoqërua të dielën pasdite me plagosjen me thikë të një 19-vjeçari. Incidenti ndodhi në një zonë të populluar të qytetit, duke alarmuar banorët përreth.
I lënduari, një djalë me inicialet M. A., 19 vjeç, u godit me thikë në kofshë gjatë përplasjes fizike mes të rinjve. Ai u mor menjëherë nën kujdes mjekësor dhe u transportua drejt Spitalit Rajonal të Korçës, ku po trajtohet dhe ndodhet jashtë rrezikut për jetën, sipas burimeve fillestare.
Menjëherë pas ngjarjes, forcat e Komisariatit të Policisë Korçë ndërhynë në vendngjarje dhe arritën të identifikojnë të dyshuarin kryesor si 23-vjeçari me inicialet R. I. Gjatë verifikimeve, rezultoi se ky shtetas ishte nën masën e sigurisë “arrest në shtëpi”, të cilën dyshohet se e kishte shkelur në momentin e ngjarjes.
Efektivët e policisë, gjatë kontrollit ndaj të riut, i sekuestruan gjithashtu një sasi të dyshuar të lëndës narkotike kanabis sativa.
Policia aktualisht është duke vijuar procedurat për ndalimin e 23-vjeçarit, teksa hetimet po zgjerojnë për të zbardhur plotësisht shkaqet dhe rrethanat e këtij konflikti mes të rinjve.
