Marina Duhani, përfaqësuese e Partisë Socialdemokrate (PSD), pritet të marrë sërish drejtimin e Këshillit të Qarkut Shkodër, pas dorëheqjes së Edmond Ndout, i cili do të drejtojë OSHKSH-në për veriun. Emri i saj do t’i nënshtrohet fillimisht miratimit në Këshillin Bashkiak Shkodër, në një procedurë që duket se është thjesht formale.
Duhani rikthehet kështu në një post që e mbajti nga korriku i vitit 2023 deri në janar të vitit 2024. Ajo u zgjodh për herë të parë në krye të institucionit më 18 korrik 2023, si përfaqësuese e PSD-së, por disa muaj më vonë dha dorëheqjen. Pas largimit të saj, drejtimin e Këshillit të Qarkut e mori Edmond Ndou, i propozuar nga Partia Socialiste.
Kush është Marina Duhani?
Duhani është pjesë e strukturave të PSD-së dhe e angazhuar në politikën vendore, ku aktualisht ushtron edhe detyrën e anëtares së Këshillit Bashkiak Shkodër.
Ajo ka përfunduar studimet për Financë-Kontabilitet në Universitetin “Luigj Gurakuqi” në Shkodër në vitin 2009, ndërsa një vit më pas ka marrë diplomën master në Tregti Ndërkombëtare në Universitetin e Alicante-s, në Spanjë.
Përvoja e saj profesionale përfshin punësimin në sektorin financiar, shitje, menaxhim projektesh dhe organizim eventesh. Gjatë viteve 2019–2020, Duhani u përfshi në një projekt binjakëzimi të Bashkimit Europian për konkurrencën e drejtë, në bashkëpunim me institucione shqiptare dhe spanjolle.
Në vitin 2023, përveç zgjedhjes në krye të Këshillit të Qarkut, ajo u bë pjesë edhe e Këshillit Bashkiak Shkodër. Në karrierën e saj përfshihet gjithashtu angazhimi në strukturat drejtuese të Aleancës Kombëtare të Këshilltarëve Bashkiakë.
