Anëtarja e Kryesisë së LDK-së, Hykmete Bajrami tha se “nuk ka ligjëratë që e ndihmon sektorin e bujqësisë”.
Ajo shkroi në një postim në Facebook se “Qeveria duhet ta subvencionojë qumështin – krejt zinxhirin: fermerin, përpunuesin dhe tregtarin, deri në masën që qumështi vendor të bëhet konkurrues në treg në krahasim me atë të importuar”.
“Dallimi në çmim duhet të jetë deri në 20 cent/litër; atëherë konsumatori e zgjedh qumështin vendor. Këto masa duhet të vazhdojnë deri në konsolidimin e sektorit. Njëjtë duhet të veprohet edhe me produkte të tjera”, shkroi ajo.
Duke përmendur zgjedhjet parlamentare të 7 qershorit, Bajrami kërkoi që qytetarët të votojnë “për program”.
“Më 7 qershor, votoni për program. Stabiliteti politik dhe zhvillimi ekonomik duhet të jenë prioritete të Qeverisë së re të dalë nga zgjedhjet e 7 qershorit”, shkroi ajo.
Së fundmi fermerët protestuan duke hedhur qumështin në lum, në shenjë pakënaqësie për rënien e çmimit të grumbullimit dhe vështirësitë në treg.
