Alarm në Firence, pasi një bombol gazi u gjet mëngjesin e kësaj të hëne poshtë kopjes së statujës së Davidit, në Piazzale Michelangelo, një nga pikat më të frekuentuara turistike të qytetit.
Bombolën e konstatoi rreth orës 07:30 një punonjëse e kompanisë së shërbimeve mjedisore Alia, e cila njoftoi menjëherë numrin e emergjencës 112. Në vendngjarje mbërritën karabinierët dhe ekipet e specializuara të artificierëve. Zona u izolua për të garantuar sigurinë.
Nuk dihet ende nëse bombola ishte e mbushur apo bosh. Hetuesit po shqyrtojnë edhe pamjet e kamerave të sigurisë së zonës për të përcaktuar se kush e ka vendosur aty dhe në çfarë rrethanash.
Më vonë, pas ndërhyrjes së artificierëve, u konstatua se bombola nuk përbënte rrezik shpërthimi. Zona u rikthye në kushtet normale të sigurisë dhe u rihap, ndërsa hetimet për të zbardhur mënyrën se si bombola përfundoi poshtë statujës vijojnë.
