Gjashtë fëmijë nga i njëjti kopsht në Korçë janë paraqitur në spital me simptoma të dyshuara helmimi dhe kanë marrë trajtim mjekësor pas konsumimit të ushqimit në institucion.
Për këtë rast, policia ka nisur procedime penale ndaj mjekes së repartit të Pediatrisë në Spitalin Rajonal të Korçës si dhe ndaj drejtoreshës së kopshtit.
Sipas të dhënave zyrtare, autoritetet dyshojnë se mjekja nuk ka lajmëruar institucionet kompetente për paraqitjen e rasteve me simptoma helmimi, ndërsa drejtoresha dyshohet se ka neglizhuar detyrat funksionale në lidhje me kontrollin dhe verifikimin e ushqimit të ofruar për fëmijët.
Njoftimi i policisë
“Specialistët për Hetimin e Krimeve në Komisariatin e Policisë Korçë proceduan penalisht në gjendje të lirë, për veprën penale ‘Shpërdorimi i detyrës’, shtetaset:”
“E. X., 57 vjeçe, me detyrë mjeke pranë Spitalit Rajonal Korçë, në pavijonin e Pediatrisë;”
“M. K., 60 vjeçe, me detyrë drejtoreshë e kopshtit ku qëndronin fëmijët që ishin paraqitur në spital.”
“Procedimi penal filloi pasi, gjatë pasdites së djeshme dhe ditës së sotme, janë paraqitur në spital 6 fëmijë nga i njëjti kopsht, me simptoma të njëjta gastrointestinale, dhe mjekja nuk ka njoftuar Policinë.”
“Ndërsa drejtoresha e kopshtit dyshohet se nuk ka përmbushur detyrimin funksional lidhur me kontrollin dhe verifikimin e ushqimit të konsumuar nga fëmijët.”
“Materialet procedurale do t’i referohen Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme procedurale.”
