Ekzekutimi i Krista Gail Pike, e dënuar për një vrasje të kryer në moshën 18-vjeçare në Tennessee, u pezullua sot nga një gjykatë federale e apelit, rreth një orë përpara se të realizohej dënimi.
Gjykata vendosi të shqyrtojë sërish nëse pretendimet e Pike për abuzim seksual dhe përdhunim gjatë fëmijërisë u konsideruan tërësisht gjatë procesit të dënimit, raportoi AP.
Pike, aktualisht 50 vjeç, dhe ish-partneri i saj u shpallën fajtorë për goditjen me thikë dhe rrahjen e 19-vjeçares Colleen Slemmer në vitin 1995. Viktima ishte shoqja e tyre në një qendër trajnimi profesional në Knoxville.
Rasti tërhoqi vëmendje të madhe në atë periudhë, pasi në trupin e Slemmer ishte gdhendur një pentagram, ndër të tjera detaje që nxitën shqetësimet për promovimin e kultit satanik në dekadat 1980 dhe 1990.
Pak para ndalimit të ekzekutimit, dëshmitarët ishin mbledhur tashmë në Burgun e Sigurisë Maksimale Riverbend në Nashville. Vendimi i gjykatës erdhi rreth orës 09:00 të mëngjesit, sipas orës qendrore të SHBA-së.
Ende nuk dihej nëse Prokurori i Përgjithshëm i Tennessee do ta apelonte vendimin e kësaj gjykate, apo sa kohë do të shtyhej ekzekutimi i planifikuar.
Afërsia e datës së ekzekutimit riktheu debatin për aplikimin e dënimit me vdekje për personat që kanë kryer krime në moshë të mitur.
Edhe pse Pike e pranon fajësinë për vrasjen, përkrahësit e saj theksojnë se shteti duhet të marrë parasysh rrethanat e moshës së saj në atë kohë, gjendjen mendore dhe një histori të gjatë abuzimi seksual, përfshirë përdhunimin gjatë fëmijërisë.
Ndihmësprokurori amerikan Stephen Ferrell deklaroi se dënimi me vdekje për Pike përbën një përjashtim, pasi të gjithë 18-vjeçarët e tjerë të dënuar me vdekje në Tennessee kanë marrë dënime të ndryshuara.
“Isha një fëmijë 18-vjeçar me sëmundje mendore. Më duheshin shumë vite për të kuptuar rëndësinë e asaj që bëra, dhe akoma më shumë për të pranuar se sa shumë jetë shkatërrova. I mora jetën fëmijës, motrës, mikut të dikujt. Tani më mundon vetëm mendimi se isha e aftë të kryeja një krim të tillë”, tha Pike në një deklaratë që ishte pjesë e kërkesës së saj për mëshirë.
Ndërkohë, nëna e Colleen Slemmer kërkon që dënimi me vdekje të zbatohet, duke theksuar se ka kaluar dekada duke pritur zbatimin e tij.
