Kryetari i Serbisë, Aleksandër Vuçiç, bëri të ditur të shtunën se kishte zhvilluar një bisedë telefonike me presidentin rus, Vladimir Putin, një ditë përpara se të jepte dorëheqjen nga posti. Gjatë kësaj bisede, Vuçiç informoi Putinin se të dielën do të tërhiqet nga detyra e tij si president i Serbisë.
“Në emër të Republikës së Serbisë dhe në emrin tim, e falënderova Federatën Ruse dhe presidentin Putin për bashkëpunimin gjatë 14 vjetëve të fundit”, tha Vuçiç.
Vuçiç shprehu bindjen se presidentët e ardhshëm të Serbisë “do të dinë të kujdesen për interesat e Serbisë dhe të ruajnë këtë lloj ekuilibri dhe këtë lloj përgjegjësie ndaj të gjithë aktorëve të rëndësishëm të politikës ndërkombëtare”. Gjatë komunikimit me Putinin, ai u ndal te bashkëpunimi dhe marrëdhëniet dypalëshe mes Serbisë dhe Rusisë, diskutoi për konfliktin në Ukrainë, si edhe për gjendjen aktuale në rajonin e Ballkanit.
Presidenti serb gjithashtu u shpreh i bindur se do të arrihet zgjatja e aneksit të marrëveshjes për furnizimin me gaz natyror ndërmjet Moskës dhe Beogradit, marrëveshje e cila skadon së shpejti, duke theksuar se Serbia do të vazhdojë të përfitojë nga një çmim i favorshëm dhe i ulët për gazin. Sipas njoftimeve, Vuçiç pritet të japë zyrtarisht dorëheqjen sot në orën 20:00. Pas dorëheqjes së tij, kryetarja e Kuvendit, Ana Brnabiç, do të marrë detyrën si ushtruese e presidentit deri në zgjedhjen e drejtuesit të ri të shtetit.
Vuçiç ka njoftuar gjithashtu se do të marrë pjesë në fushatën zgjedhore si qytetar në zgjedhjet e parakohshme parlamentare të caktuara për 25 tetor 2026. Ai është vendosur në krye të listës së partisë në pushtet dhe synon të vijojë aktivitetin politik. Në varësi të rezultatit të zgjedhjeve dhe formimit të qeverisë, Vuçiç planifikon të rikthehet në postin e kryeministrit të Serbisë.
