26 vota pro, 10 kundër dhe 1 abstenim. Këshilli Bashkiak i Shkodrës ka miratuar qëndrimin në favor të riorganizimit të territorit të bashkisë, në kuadër të projektligjit për ndarjen e re administrative-territoriale.
Nëse ndryshimet marrin miratimin përfundimtar në Kuvend, territori i Bashkisë Shkodër parashikohet të përfshijë edhe dy qytete të reja administrative, Dukagjinin dhe Velipojën. Administrimi i tyre do të bëhet përmes zëvendëskryetarëve të bashkisë.
Procesi është shoqëruar me debate në mbledhjen e Këshillit Bashkiak. Këshilltarët e Partisë Demokratike kanë kundërshtuar propozimin, duke e cilësuar atë si një nismë të Partisë Socialiste. Sipas tyre, riorganizimi synon uljen e numrit të bashkive në vend, nga 61 që janë aktualisht në 46.
