Të paktën 49 njerëz kanë humbur jetën dhe 182 të tjerë janë shtruar në spital në shtetin jugperëndimor të Ondos, Nigeri, pas konsumimit të alkoolit të falsifikuar.
Komisioneri i Shëndetësisë i Ondos, Bandji Ajaka, bëri të ditur se numri i viktimave është rritur ndjeshëm. Autoritetet lokale, më 5 shtator, kishin raportuar fillimisht për 29 viktima brenda një jave si pasojë e konsumimit të pijeve të falsifikuara.
Sipas hetimeve, dyshohet se shkaku i helmimit është metanoli, një substancë jashtëzakonisht toksike që përdoret ilegalisht në disa pije alkoolike të prodhuara pa kontroll zyrtar.
Autoritetet kanë shpjeguar se viktimat kanë konsumuar një lloj xhini të prodhuar vendas dhe të njohur në komunitet si “Bishti i Majmunit”. Në shumë zona të Nigerisë, qarkullon gjerësisht alkooli i parregulluar, pasi është lehtësisht i prodhueshëm dhe me kosto më të ulët krahasuar me pijet zyrtare të licencuara.
Sipas Ajaka, rastet e helmimit mund të lidhen me dy ceremoni tradicionale të zhvilluara në zonën Odigbo, ku pjesëmarrësit kanë konsumuar pije lokale alkoolike. Për momentin, këto lidhje mbeten të pakonfirmuara nga analizat laboratorike.
Simptomat që kanë shfaqur të prekurit përfshijnë dhimbje të forta koke dhe trupi, probleme në frymëmarrje, halucinacione, deri edhe verbëri.
“Ndodh shumë shpejt. Sapo e pinë, në varësi të sasisë, veshkat ndalojnë së funksionuari, sytë verbohen dhe truri dëmtohet”, deklaroi Ajaka, duke ilustruar ashpërsinë e pasojave të helmimit.
