Irlanda ka njoftuar se nuk do të marrë pjesë në Eurovision 2027, që do të mbahet në Bullgari. Transmetuesi publik irlandez RTÉ ka konfirmuar gjithashtu se nuk do të transmetojë këtë ngjarje muzikore.
Sipas RTÉ, vendimi për t’u tërhequr lidhet me situatën e rënduar në Gaza, ku “humbja e vazhdueshme e jetëve” dhe kriza humanitare janë të paarsyeshme për të justifikuar pjesëmarrjen në konkursin muzikor.
RTÉ u shpreh në deklaratën e tij se “situata në Gaza vazhdon të rrezikojë jetën e shumë civilëve”. Transmetuesi shtoi se është i shqetësuar nga “mungesa e aksesit të pavarur të gazetarëve ndërkombëtarë në territor”.
Irlanda, që ka arritur të fitojë Eurovisionin plot shtatë herë, mungoi edhe në edicionin e vitit 2026, kur Izraeli ishte pjesëmarrës dhe u rendit i dyti, pas Bullgarisë. Martin Green, drejtori i Eurovision Song Contest, deklaroi se organizatorët “e respektojnë vendimin e RTÉ-së”, ndërsa shprehën “keqardhje për mungesën e Irlandës”.
Green theksoi se qëllimi i Eurovisionit është të afrojë artistë dhe transmetues nga shtete të ndryshme “përmes muzikës dhe krijimtarisë”, sidomos në kohë kur “bota po përjeton konflikte dhe ndarje të shumta”.
Organizatorët sqaruan se çdo vit i takon transmetuesve të marrin vendimin për pjesëmarrjen e tyre në konkurs. Ata nënvizuan se do të mbajnë hapur komunikimin me RTÉ dhe shpresojnë që Irlanda të rikthehet në të ardhmen në Eurovision.
