Zyra për Koordinimin e Çështjeve Humanitare të OKB-së (OCHA) ka ngritur shqetësim të thellë për vazhdimin e ofensivës ushtarake izraelite në territoret e banuara të Rripit të Gazës, duke theksuar rrezikun e madh me të cilin përballen civilët.
Zëvendëszëdhënësi i OKB-së, Farhan Haq, deklaroi se organizata po vijon të nënvizojë domosdoshmërinë e mbrojtjes së civilëve dhe infrastrukturës së tyre, përfshirë punonjësit humanitarë, furnizimet dhe asetet e tyre.
Haq, duke iu referuar statistikave të UNICEF-it, bëri të ditur se “nëntë fëmijë janë vrarë ose kanë ndërruar jetë nga plagët e marra gjatë javës së fundit”.
Përveç tyre, nga të shtënat kanë humbur jetën edhe një grua shtatzënë bashkë me foshnjen që mbante në bark, ndërkohë që të paktën 13 fëmijë të tjerë janë plagosur.
Sipas OKB-së, gjatë fundjavës janë regjistruar sulme në pjesë të ndryshme të territorit të Gazës, sidomos në perëndim të “Linjës së Verdhë”, ku është raportuar përdorimi i sulmeve ajrore, artilerisë, zjarrit nga deti dhe armëve të zjarrit.
Numrat e raportuar tregojnë se nga 8 tetori 2023, në Gaza janë vrarë mbi 73 mijë palestinezë dhe mbi 174 mijë kanë mbetur të plagosur. Po ashtu, rreth 90 për qind e infrastrukturës së enklavës është dëmtuar ose shkatërruar.
Ndërkohë, Ministria e Shëndetësisë në Gaza bën të ditur se pas marrëveshjes së armëpushimit të arritur më 10 tetor, janë vrarë 1.372 palestinezë dhe 4.659 të tjerë janë plagosur si rezultat i shkeljeve të dyshuara të këtij armëpushimi.
