Kryetari i Bashkisë së Shkodrës, Benet Beci, ka përcjellë mbrëmjen e sotme një urim të përzemërt për të gjithë besimtarët katolikë që kremtojnë Natën e Shënkollit të Majit.
Përmes një postimi në rrjetet sociale, shoqëruar me imazhin e kishës simbol të Thethit, Beci ka vlerësuar rëndësinë e kësaj feste për krahinat e veriut dhe mbarë Shkodrën.
Mesazhi i plotë i Benet Becit:
“Gëzuar Natën e Shënkollit të Majit! Një natë e shenjtë për besimtarët katolikë në Dukagjin, Malësi e Madhe dhe gjithë Shkodrën. Lutja, drita dhe besimi mbushin çdo shtëpi e zemër në këtë natë të veçantë. Zoti bekoftë familjet tuaja dhe sjelltë paqe, shëndet e mirësi për të gjithë!”
Pse festohet Shënkolli i Majit?
Kjo festë, e njohur ndryshe edhe si Shënkolli i Verës, përkon me datën 9 maj (nata e së cilës kremtohet sot) dhe lidhet me transferimin e relikteve të Shën Kollit (Shën Nikollës). Është një festë mjaft e ndier veçanërisht në zonat e Dukagjinit dhe Malësisë, ku tradita e festimeve mbledh familjet në harmoni dhe besim.
