Një video që ka qarkulluar në rrjetet sociale ka ngjallur shqetësim dhe reagime, pasi në pamje shfaqet një fëmijë, rreth 10-12 vjeç, duke lëvizur natën në rrugët e Shkodrës me një karrocë pune dhe duke mbledhur mbetje.
Në video, fëmija shihet teksa shtyn karrocën, ndërsa në të ndodhen edhe mjete të tjera që ngjajnë me pajisje të përdorura për pastrimin e rrugëve. Pamjet janë veçanërisht shqetësuese për shkak të moshës së vogël të fëmijës dhe faktit që ai duket se ndodhet vetëm, në orët e natës.
Kjo ngre një sërë pikëpyetjesh për mënyrën se si po menaxhohen shërbimet e pastrimit në qytet dhe, mbi të gjitha, për përgjegjësinë e institucioneve që duhet të garantojnë mbrojtjen e fëmijëve.
Nga pamjet nuk mund të konfirmohet nëse fëmija është i angazhuar nga Bashkia Shkodër, nga një kompani që kryen shërbime pastrimi apo nëse ndodhet aty për një arsye tjetër. Por fakti që ai përdor një karrocë dhe mjete pune që ngjajnë me ato të shërbimeve të pastrimit kërkon një sqarim të menjëhershëm.
Nëse pamjet tregojnë një fëmijë që është realisht duke kryer punë pastrimi në rrugët e qytetit, atëherë kemi të bëjmë me një situatë që nuk mund të anashkalohet dhe që kërkon verifikim të menjëhershëm nga institucionet përgjegjëse.
Bashkia Shkodër dhe Benet Beci duhet të japin përgjigje për këto pamje, sepse në një qytet ku shërbimet publike menaxhohen nga institucionet, është e papranueshme që një fëmijë i moshës 10-12 vjeç të shihet natën në rrugë, duke bërë atë që duket si punë pastrimi.
Institucionet duhet të sqarojnë nëse bëhet fjalë për punësim të paligjshëm të një të mituri, për një situatë familjare apo për një rrethanë tjetër. Përgjigjet i takojnë Bashkisë Shkodër.
