Gjykata e Nîmes dënoi gjyqtarin Abdelatif Kherradji me gjashtë muaj burgim me kusht për dhunë në familje ndaj partneres së tij. Përveç dënimit, 40-vjeçari duhet të marrë pjesë në një kurs për parandalimin e dhunës ndaj grave.
Ky vendim rezultoi më i butë krahasuar me kërkesën e prokurorit, i cili kishte propozuar 18 muaj burg me kusht, trajtim të detyrueshëm mjekësor dhe zbatim të menjëhershëm të dënimit. Dënimi nuk do të shënohet në regjistrin penal të arbitrit.
Avokati i Kherradji-t, Bruno Rebstock, deklaroi: “Jemi të zhgënjyer nga parimi i vendimit, sepse kishim kërkuar lirim nga akuzat. Ne rezervojmë të drejtën për të apeluar brenda dhjetë ditësh.”
Hetimi ndaj arbitrit u hap mbi dy episode të dyshuara që ndodhën përkatësisht më 13 mars dhe 13 maj. Sipas prokurorisë, gjatë debatit të parë Kherradji e kishte kapur partneren nga qafa, krahët dhe flokët, ndërsa në rastin e dytë, kishte tërhequr dhe shtyrë atë drejt një muri. Si pasojë e lëndimeve, gruaja u shtrua për tre ditë në spital.
Kherradji ka këmbëngulur se akuzat janë të pabazuara, duke u shprehur para hetuesve se përplasja ishte e ndërsjellë. Ai gjithashtu ka depozituar një kallëzim, duke paraqitur edhe një raport mjekësor për lëndimet e tij.
Gjyqtari ka drejtuar 28 ndeshje në Ligue 1 gjatë dy sezoneve të fundit, si dhe 90 ndeshje në Ligue 2. Ndeshja e fundit që arbitroi ishte më 12 prill, mes skuadrave Nisë dhe Le Havre. Pas këtij vendimi, mbetet për t’u parë se cilat masa disiplinore do të marrë Federata Franceze e Futbollit (FFF) ndaj tij.
