Në Shkodër është prezantuar edicioni i fundit i revistës “Art & Trashëgimi”, një numër i veçantë që i kushtohet trashëgimisë katolike shqiptare. Promovimi u zhvillua në ambientet e Bazilikës së Zojës së Këshillit të Mirë.
Botimi përmban 220 faqe dhe është publikuar në dy gjuhë, shqip dhe anglisht, duke synuar që historia dhe pasuria e kësaj trashëgimie të përcillen edhe përtej publikut shqiptar.
Në këtë numër janë përfshirë punime të rreth 40 studiuesve dhe intelektualëve nga Shqipëria, Kosova, diaspora shqiptare dhe institucione akademike europiane. Kontributet trajtojnë aspekte të ndryshme të trashëgimisë katolike, nga historia dhe arti te kultura, letërsia dhe dimensioni shpirtëror.
Një pjesë e rëndësishme i kushtohet artit sakral, letërsisë së hershme shqipe, figurave fetare dhe veprimtarisë së urdhrave monastikë, veçanërisht françeskanëve dhe dominikanëve në Shqipëri.
Revista sjell në vëmendje edhe kontributin që institucionet dhe personalitetet e lidhura me traditën katolike kanë dhënë ndër vite në zhvillimin e arsimit, ruajtjen e gjuhës shqipe, kulturës dhe identitetit kombëtar.
Zgjedhja e Shkodrës për promovimin e këtij botimi nuk është e rastësishme. Qyteti mbetet një nga pikat kryesore të historisë dhe trashëgimisë katolike në Shqipëri, ndaj prezantimi në këtë hapësirë i jep revistës një dimension të veçantë simbolik.
Përmes këtij botimi, “Art & Trashëgimi” synon të dokumentojë dhe të bëjë më të njohur një pjesë të rëndësishme të trashëgimisë shqiptare, jo vetëm për brezat e sotëm, por edhe për studiuesit dhe lexuesit jashtë vendit.
