Zjarri që ka përfshirë zonën e Lurës është përshkallëzuar ndjeshëm gjatë ditëve të fundit. Forca të shumta vijojnë përpjekjet për të frenuar flakët që po përhapen në disa drejtime dhe tashmë rrezikojnë të afrohen pranë banesave.
Një banor rreth të 70-ave shprehet se nuk ka kujtesë për ndonjë zjarr të ngjashëm në këtë zonë, ndërsa thekson se “situata aktuale është shqetësuese”.
Valët e të nxehtit dhe tymi i dendur kanë mbuluar fshatin, duke krijuar vështirësi të mëdha në frymëmarrje për banorët. Në terren janë të pranishme ekipe të zjarrfikësve, punonjës të bashkisë, staf nga zonat e mbrojtura, Forcat e Armatosura si dhe vetë banorë të komunitetit, ndërkohë që nga ajri është mobilizuar edhe ndërhyrja me avion.
Situata është bërë më kritike pasi flakët janë afruar drejt Kishës së Fushë-Lurës, duke rritur shqetësimin për banesat dhe objektet që ndodhen pranë vatrës së zjarrit.
Edhe pse po zhvillohen operacione të shumta nga toka dhe ajri, terreni i vështirë dhe kushtet atmosferike të pafavorshme e pengojnë përpjekjen për të shuar zjarrin. Strukturat në terren vijojnë luftën për izolimin dhe shuarjen e flakëve.
