Një skenë paniku shpërtheu gjatë një festivali në Zacatlán, Meksikë, pasi një automjet hyri pa paralajmërim mes turmës, duke shkaktuar hutim dhe një valë largimesh të shpejta nga ana e vizitorëve të pranishëm.
Incidenti la të paktën 15 persona të plagosur. Autoritetet vendore raportuan se fatmirësisht, nuk pati viktima. Sipas kryetares së bashkisë së Zacatlán, Betty Sanchez, të gjithë të lënduarit janë në gjendje të stabilizuar dhe jashtë rrezikut për jetën.
Menjëherë pas ngjarjes, ekipet e emergjencës u mobilizuan në vendin e aksidentit për të ofruar ndihmën e parë të dëmtuarve. Shoferi i automjetit u ndalua nga policia dhe mjeti u sekuestrua për hetime të mëtejshme.
Kryebashkiakja sqaroi se dyshohet që drejtuesi i makinës mund të ketë qenë përballur me një problem shëndetësor në momentin kritik, çka mund të ketë çuar në humbje të kontrollit të automjetit. Megjithatë, ajo theksoi se ky është ende një version paraprak dhe duhet të konfirmohet nga hetimet dhe ekspertizat përkatëse.
Autoritetet kanë nisur hetimet për të sqaruar në detaje shkaqet dhe rrethanat e ngjarjes që detyroi makinën të përplasej me turmën e festivalit.
