Një sulm me dronë ukrainas në rajonin rus të Belgorodit ka rezultuar në vdekjen e pesë personave, pasi objektiva civile u goditën nga mjetet ajrore pa pilot.
Zëdhënësja e Komitetit Hetues të Rusisë, Svetlana Petrenko, njoftoi hapjen e një “çështjeje penale në lidhje me një akt terrorist”.
“Formacionet e armatosura ukrainase përdorën mjete ajrore pa pilot për të goditur objektiva civile në Belgorod, duke përfshirë ndërtesa apartamentesh, disa ndërtesa administrative dhe objekte të infrastrukturës sociale.
“Sulmi rezultoi në viktima dhe të plagosur, me fëmijë midis të plagosurve”.
Sipas autoriteteve rajonale, mes të plagosurve ishte edhe një djalë katërvjeçar.
Administrata bëri të ditur se sulmet me dronë kanë dëmtuar gjithsej 29 blloqe banimi, pesë shtëpi, ndërtesa administrative si edhe “objekte tregtare” të papërcaktuara.
Ndërkohë, Ministria ruse e Mbrojtjes raportoi se mbrojtja ajrore gjatë një periudhe 12-orëshe ka rrëzuar 285 dronë ukrainas në rajone të ndryshme të vendit.
