Banorët e njësisë administrative Fierzë, në bashkinë e Fushë-Arrëzit, kanë dalë kundër draftit të propozuar nga Partia Socialiste për bashkimin e kësaj bashkie me Pukën.
Kryepleqtë e nëntë fshatrave të zonës u mblodhën sot pranë vendit tradicional të kuvendeve, afër Kishës së Fierzës, nga ku i bënë thirrje qeverisë të rishikojë vendimin për bashkimin administrativ. Sipas tyre, ky ndryshim do t’i largojë edhe më shumë shërbimet nga banorët e zonës.
Njësia administrative Fierzë ndodhet rreth 100 kilometra larg qytetit të Pukës. Banorët e kësaj zone, nga e cila prodhohet një pjesë e konsiderueshme e energjisë elektrike për vendin, shprehen se prej më shumë se 30 vitesh janë lënë në harresë nga qeveritë e njëpasnjëshme.
Ata ngrenë shqetësimin për degradimin e vazhdueshëm të sistemit arsimor dhe atij shëndetësor, duke theksuar se mungesa e investimeve ka ndikuar drejtpërdrejt në largimin masiv të popullsisë.
Kryepleqtë e fshatrave të Fierzës deklaruan se do t’i bashkohen protestës së thirrur për të premten, në orën 17:00, nga Bashkia e Fushë-Arrëzit, e cila kundërshton draftin për bashkimin me bashkinë e Pukës.
