Mario Mitaj është zyrtarisht futbollist i Xhenoas. Mbrojtësi i Kombëtares shqiptare nis një kapitull të ri në karrierën e tij, duke u rikthyer në futbollin europian dhe duke u bërë pjesë e Serie A italiane.
Transferimi i 22-vjeçarit u finalizua në formulën e huazimit nga Al Ittihad, ndërsa interesimi për të nuk ka munguar. Për Mitajn kishte shfaqur interes edhe Porto, por në fund ishte Xhenoa që fitoi garën për të siguruar shërbimet e mbrojtësit shqiptar.
Pas eksperiencave me AEK-un e Athinës, Lokomotivën e Moskës dhe Al Ittihadin në Arabinë Saudite, Mitaj është gati për një tjetër sfidë në një nga kampionatet më të forta të Europës.
Me skuadrën saudite, ai regjistroi 58 paraqitje dhe arriti të fitojë edhe titullin kampion. Megjithatë, sezoni i fundit nuk ishte i lehtë për shqiptarin. Kufizimet mbi numrin e futbollistëve të huaj në kampionatin saudit bënë që ai të mbetej shpesh jashtë planeve të skuadrës.
Kalimi te Xhenoa i jep Mitajt mundësinë të rikthehet në një kampionat elitar dhe të fitojë më shumë minuta në fushë, një zhvillim pozitiv edhe për Kombëtaren shqiptare në prag të sfidave të ardhshme.
