Sali Berisha, kryetari i Partisë Demokratike, ka komentuar së fundmi thirrjet që janë bërë kundër tij gjatë protestave, duke rikujtuar episode nga e kaluara dhe duke pohuar se ndaj tij janë ndërmarrë përpjekje për eliminim.
Gjatë një interviste në emisionin “Off the Record” në A2 CNN, Berisha theksoi se që prej vitit 1991 është përballur me thirrje kundër tij, duke sjellë ndër mend slogane të tilla si “Sali Berisha në litar” dhe “Sali Berisha në burg”.
Ai shtoi se gjatë fazave të ndryshme të zhvillimeve politike ka qenë objekt i sulmeve dhe akuzave.
“Që nga viti 1991 e deri më sot ka pasur gjithnjë, herë qindra, herë mijëra, herë dhjetëra mijëra, që kërkonin ‘Sali Berisha në litar’, ‘Sali Berisha në burg’. Brigadat vullnetare të Hysni Milloshit, kur përmbysën shtatoren e diktatorit, donin me çdo kusht ‘Sali Berisha në hell’”, u shpreh Berisha.
Berisha foli më tej edhe për vitin 1997, duke pretenduar se ka pësuar atentate në atë kohë. Ai gjithashtu u ndal te një akuzë nga viti 1999, të cilën e cilësoi si të pabazë.
Lideri i PD-së u ndal edhe te kërkesat për arrestimin e tij, duke përmendur deklarimet e kryeministrit Edi Rama dhe reagimet e disa diplomatëve të huaj.
“Besoj i ke të freskëta deklaratat e Ramës për arrestimin e Sali Berishës. Arrestimin e Sali Berishës e kërkuan edhe diplomatë të huaj dhe ajo ndodhi”, tha kreu i PD-së.
