Kryeministri i Izraelit, Benjamin Netanyahu, pavarësisht debatit publik dhe kërkesave për arrestimin e tij, ka bërë të ditur se do të marrë pjesë në sesionin e Asamblesë së Përgjithshme të Kombeve të Bashkuara që do të zhvillohet në Nju Jork këtë vjeshtë.
Kjo deklaratë u bë pas qëndrimit të kryebashkiakut të Nju Jorkut, Zohran Mamdani, i cili më herët kishte pohuar se do të ekzekutonte urdhër-arrestin e lëshuar ndaj Netanyahut nga Gjykata Penale Ndërkombëtare në vitin 2024.
Megjithëse Mamdani u shpreh i vendosur, javën e kaluar ai pranoi se administrata e tij nuk posedon autorizim ligjor për arrestimin e kryeministrit të Izraelit. Sipas tij, përgjegjësia për këtë çështje i takon autoriteteve federale dhe jo qeverisë lokale të qytetit.
Gjatë një interviste në Fox News, Netanyahu u shpreh se nuk ndjehet i kërcënuar nga deklaratat e Mamdanit. Ai e akuzoi këtë të fundit për nxitje të “urrejtjes dhe përçarjes”.
“Ai supozohet të jetë kryetari i bashkisë së të gjithë banorëve të Nju Jorkut: hebrenjve, të krishterëve, myslimanëve, të gjithëve. Por ai po përpiqet ta kthejë një grup kundër tjetrit dhe po mbjell urrejtje dhe frikë”, tha Netanyahu.
Këtë javë, Netanyahu ka planifikuar të vizitojë Shtetet e Bashkuara për një takim me presidentin Donald Trump në Shtëpinë e Bardhë si dhe për të marrë pjesë në ceremoninë mortore të senatorit Lindsey Graham. Vizita në Nju Jork nuk është pjesë e këtij udhëtimi aktual, ndërsa pjesëmarrja në Asamblenë e Përgjithshme të OKB-së pritet të ndodhë gjatë vjeshtës.
Zohran Mamdani, i njohur për mbështetjen e tij ndaj kauzës palestineze, e ka quajtur Netanyahun “kriminel lufte”, duke premtuar gjatë fushatës se do të ekzekutonte urdhër-arrestin e Gjykatës Penale Ndërkombëtare të vitit 2024.
Izraeli ka hedhur poshtë akuzat për krime lufte në Gaza, ndërsa Netanyahu i ka quajtur këto akuza të pabazuara.
