Kryeministri Edi Rama këtë të martë ka mbajtur fjalën e tij në konferencën e nëntë ndërqeveritare mes BE-së dhe Shqipërisë në Bruksel. Rama ka deklaruar se Shqipëria po mbyll 3 kapitujt e parë të negociatave me Bashkimin Europian teksa e ka cilësuar si një gur kilometrik të rëndësishëm në rrugëtimin e pakthyeshëm të Shqipërisë drejt BE-së. Ndër të tjera ai shtoi se kjo tregon se Shqipëria po jep rezultate dhe po ecën përpara.
“Ajo çfarë ndodhi tani shënon vërtet një gur kilometrik tjetër të rëndësishëm në rrugëtimin e pakthyeshëm të Shqipërisë në BE. Sapo ramë dakord të mbyllim 3 kapituj të rëndësishëm negociatorë dhe ky nuk është thjesht një hap, po një vlerësim i qartë që Shqipëria po ecën përpara, që reformat po japin rezultate dhe që vendi ynë është gjithnjë më i përgatitur për të marrë përsipër përgjegjësitë e anëtarësimit. Eshtë më e rëndësishme, sepse thekson një mesazh mjaft të fuqishëm që Shqipëria jep rezultate. dhe BE jep rezultate. Shqipëria ecën përpara dhe BE reagon.
Proces i besueshëm, i bazuar në meritë nga të dyja anët. Është jashtëzakonisht shumë inkurajuese, super e rëndë. Faleminderit, Marta, që ke qenë koherente e durueshme dhe që na ke mbajtur në drejtim pavarësisht pengave dhe ne po sjellim standardet evropiane më pranë qytetarëve tanë, po forcojmë institucionet tona, po krijojmë më shumë mundësi. Prova më e mirë e kësaj është që njerëzit duan më shumë dhe njerëzit janë gjithmonë e më pak tolerantë ndaj asaj që ende nuk funksionon”, tha Rama ndër të tjera.
