Kategoria e Parë e futbollit në Shqipëri zhvilloi këtë të dielë gjashtë ndeshjet e raundit të 31-të.
Dy sfida nga fundi i sezonit janë mësuar edhe verdiktet e para, me Skënderbeun dhe Laçin që janë rikthyer zyrtarisht pas një viti në Superligë.
Një vend në play-off e kanë të sigurt edhe Pogradeci me Ilirinë, ndërsa në dy raundet e fundit që kanë mbetur do ketë garë për titullin kampion, dy vendet e tjera në play-off, zonën play-out dhe sigurimin e mbijetesës.
Në stadiumin e Korçës vendasit e Skënderbeut fituan 4-0 kundër Kastriotit dhe me këto tri pikë kanë krijuar distancën e nevojshme që zyrtarisht të jenë në Superligë sezonin e ri. Ndërkohë gara vijon me Laçin për trofeun kampion.
Në Laç, vendasit fituan 2-0 ndeshjen direkte kundër Pogradecit dhe me diferencën prej gjashtë pikësh nga liqenorët, marrin një biletë për në Superligë.
Në Laç ndeshja ishte e tensionuar, ndërsa tifozët hodhën sende të forta në fushë. Myrta për Laçin dhe Abazaj e Dragoshi për miqtë u ndëshkuan me kartona të kuq nga kryesori Florjan Lata në fundin e takimit.
Për momentin AF Luftëtari dhe Kukësi shkojnë në ndeshjen shtesë, ndërsa Apolonia dhe Lushnja nëse nuk grumbullojnë pikë janë të rrëzuara nga Kategoria e Parë, teksa kanë mbetur edhe dy raunde për verdiktet finale.
