Një stuhi e fuqishme me reshje shiu dhe përmbytje goditi disa zona në Misuri ditën e premte, duke çuar në evakuimin me helikopter të mbi 200 fëmijëve dhe anëtarëve të stafit nga një kamp veror.
Garda Kombëtare e Ushtrisë ka përdorur helikopterët Black Hawk për të transportuar ata në një shkollë fillore në afërsi, ku janë ribashkuar me familjet e tyre.
Kampi shprehu falënderime për ekipet e emergjencës në një postim të vonshëm në Instagram, duke deklaruar: “Jemi më shumë se mirënjohës për ndihmën tuaj në mbajtjen e komunitetit tonë të kampit të sigurt.”
Shërbimi Kombëtar i Motit lëshoi paralajmërime për përmbytje të menjëhershme në rajon, ku reshjet shënuan 15-30 cm ndërsa stuhitë u ndjekën njëra pas tjetrës, sipas Matt Beitscher, një meteorolog kryesor në zyrën e NWS në St. Louis.
Po ashtu, Shërbimi Kombëtar i Ujit njoftoi se nëse Misuri juglindor do të përjetonte më shumë reshje të fuqishme gjatë natës deri në mëngjesin e së shtunës, përmbytjet do të kishin pasoja të konsiderueshme.
Guvernatori i Misurit, Mike Kehoe, shpalli gjendje të jashtëzakonshme dhe aktivizoi një nga ekipet e kërkim-shpëtimit të shtetit për të ofruar ndihmë. Ai theksoi se pasditen e së premtes, qindra individë ishin shpëtuar nga ujërat e përmbytjeve, pemët, çatitë dhe automjetet e bllokuara.
Në qarkun Reynolds, dy anije shpëtimi u përmbysën si pasojë e përmbytjeve, por personeli tjetër i emergjencës arriti të shpëtonte sigurt ekipet e ndihmës.
