Kryetari i Forumit të Partisë Demokratike në Shkodër ka ngritur akuza publike ndaj Bashkisë Shkodër, duke vënë në dyshim mënyrën se si janë përzgjedhur përfituesit e skemës së granteve për biznesin.
Përmes një reagimi në rrjetet sociale, ai pyet nëse mes përfituesve të financimeve ka pasur persona të lidhur me Partinë Socialiste, duke përmendur konkretisht rastin e djalit të kryetarit të Këshillit Bashkiak, i cili ka përfituar nga kjo skemë.
Demokrati ka ngritur gjithashtu pikëpyetje edhe për financimin e një podcasti, duke lënë të kuptohet se përzgjedhja mund të jetë ndikuar nga qëndrime të mëparshme publike në mbështetje të kryebashkiakut Benet Beci.
Në reagimin e tij, kreu i Forumit të PD-së i ka bërë thirrje bizneseve që janë skualifikuar nga skema e granteve të shprehen publikisht, ndërsa akuzon drejtuesit e Bashkisë Shkodër për favorizime politike.
Deri më tani nuk ka pasur një reagim zyrtar nga Bashkia Shkodër lidhur me këto pretendime.
Postimi i plotë:
A FAVORIZOI Bashkia Shkodër PERSONA TË LIDHUR ME PS NË SKEMËN E GRANTEVE PËR BIZNESIN?
A mendoni të dashur qytetarë të Shkodrës që djali i kryetarit të Këshillit Bashkiak e fitoi me meritë këtë financim?
Çfarë mendoni ju biznese që u skualifikuat nga kjo skemë?
Si mendoni a u fitua financimi i një podcasti, sepse personazhi në fjalë pak kohë më parë përmes një reportazhi na tregonte se sa i “mirë” është hajduti i 320 mijë eurove #Benet_Beci?
Kjo është fytyra e rilindasve komunist që sot po drejtojnë Shkodrën.
