Pas reagimit të banorëve të Nikaj-Mërturit dhe paralajmërimit për protestë kundër ndërhyrjeve në lumin e Lekbibajt, ka reaguar edhe KESH, si investitore e projektit.
Në një deklaratë zyrtare, KESH sqaron se ndërhyrja ka të bëjë me ndërtimin e pritave malore në rrjedhën ujore të Lekbibajt, me qëllim mbrojtjen e liqenit të Komanit dhe garantimin e funksionimit normal të hidrocentraleve të kaskadës së Drinit.
Sipas korporatës, rrjedha natyrore e Lekbibajt transporton çdo vit sasi të konsiderueshme gurësh dhe sedimentesh drejt liqenit të Komanit, duke ndikuar negativisht në funksionimin e HEC Fierzë dhe në efiçencën e prodhimit të energjisë elektrike.
KESH bën me dije se projekti parashikon ndërtimin e disa pritave malore që do të ndalojnë inertet para se ato të përfundojnë në rezervuar, duke reduktuar ndjeshëm depozitimin e aluvioneve në liqen.
Në deklaratë theksohet se investimi është realizuar në përputhje me të gjitha procedurat ligjore, duke disponuar vendimin për VNM paraprake nga AKM, kontrollin e Oponencës Teknike dhe lejen e infrastrukturës nga Bashkia Tropojë.
“Kjo është një masë inxhinierike e domosdoshme për mbrojtjen e infrastrukturës energjetike kombëtare”, thuhet në reagimin e KESH.
Korporata nënvizon se mbetet e angazhuar për garantimin e furnizimit me energji elektrike për qytetarët shqiptarë, duke respektuar legjislacionin në fuqi dhe komunitetin e zonës së Nikaj-Mërturit.
