Gjykata e Lezhës ka dënuar këtë të mërkurë me burgim të përjetshëm Ruben Saraivën, autorin portugez të vrasjes së biznesmenit, Ardian Nikulajt, ngjarje e regjistruar në prill të vitit 2023 në Shëngjin.
Saraiva akuzohet për veprën penale “Vrasje e kryer për interes ose hakmarrje”, si dhe për “Mbajtja pa leje dhe prodhimi i armëve, armëve shpërthyese dhe municionit”. Vrasja ndodhi brenda hotelit të Nikulajt në Shëngjin.
Biznesmeni ishte ulur në lokalin e hotelit kur u afrua portugezi me skafandër në kokë duke e qëlluar për vdekje. Sipas prokurorisë, vrasja e Nikulajt dyshohet se u porosit nga Edmond Haxhia, i cili jeton në Britaninë e Madhe, për motive gjakmarrje. Të përfshirë si ndihmës edhe 4 shtetas britanikë.
Vrasja e biznesmenit Ardian Nikulaj ishte vijim i zinxhirit të hakmarrjes që familja e viktimës kanë me fisin Lekstakaj, konflikt i nisur në 1997 duke shkaktuar bilanc me shumë viktima mes dy fiseve.
