Një valë e pazakontë e të nxehtit ka pushtuar pjesë të mëdha të Evropës, duke shkaktuar pasoja të rënda, përfshirë temperatura rekord, masa emergjente dhe ndikime të ndjeshme mbi jetën e qytetarëve.
Në Francë, rreth 3,500 shkolla janë mbyllur për shkak të vështirësive që sjellin temperaturat e larta, ndërsa rreth 10,000 të tjera kanë ndryshuar oraret e tyre, duke zhvilluar aktivitetet kryesisht në orët e para të mëngjesit, kur temperaturat janë më të arritshme.
Édouard Geffray, ministri i Arsimit në Francë, në një deklaratë për televizionin France 2, shpjegoi se këto masa janë ndërmarrë me qëllim mbrojtjen e nxënësve dhe stafit arsimor nga të nxehtit ekstrem që po godet vendin.
Në Spanjë, vala e të nxehtit ka rezultuar fatale, duke shkaktuar rreth 212 viktima brenda një periudhe katër ditore. Këto shifra janë raportuar nga sistemi spanjoll i monitorimit të vdekshmërisë, MoMo mortality monitoring system, i cili analizon ndryshimet në numrin e vdekjeve në krahasim me mesataren e pritshme duke u mbështetur në të dhënat historike.
Vlerësimet e para tregojnë se temperaturat ekstreme të regjistruara ditët e fundit kanë ndikuar në rritjen e ndjeshme të vdekshmërisë në vend. Autoritetet vazhdojnë të apelojnë qytetarëve, përfshirë të moshuarit dhe ata me probleme shëndetësore, që të shmangin ekspozimin në orët më të nxehta të ditës.
Situata e temperaturave të larta ka ndikuar edhe në Britaninë e Madhe, ku janë vendosur kufizime për përdorimin e ujit në disa zona për shkak të rritjes së konsumit. Në qarkun e Kentit, i vendosur në jug të Anglisë, është ndaluar përdorimi i zorrëve dhe pompave të ujit për kopshtet, duke prekur rreth 850,000 banorë në përpjekje për të ruajtur rezervat ujore.
Në të njëjtën kohë, Britania e Madhe ka regjistruar temperatura rekord për muajin qershor, me një shifër që ka kaluar 36 gradë Celsius, ndërsa meteorologët parashikojnë edhe temperatura të tjera ekstreme në ditët në vijim.
Përveç problemeve shëndetësore, vala e të nxehtit që po përfshin Evropën po shkakton gjithashtu ndërprerje në aktivitetin normal, mbyllje shkollash dhe masa të jashtëzakonshme për menaxhimin e ujit dhe për mbrojtjen e qytetarëve.
