Ministri i Pushtetit Vendor, Ervin Demo, ka njoftuar se Paketa e Maleve është një iniciativë e hapur dhe transparente, e cila përfshin gjithashtu këshillat bashkiakë.
Demo theksoi se procesi është në zhvillim e sipër në disa bashki të vendit, ku tashmë janë miratuar aplikimet e para. Ai veçoi Bashkinë Shkodër, Vau i Dejës dhe Shijakun si ato që kanë përfunduar këtë fazë të miratimit.
Në lidhje me avancimin e këtij procesi, ministri njoftoi se numri i aplikimeve në të gjithë territorin shqiptar ka tejkaluar 2 mijë. Ai nënvizoi se janë vendosur një sërë filtrash në nivel lokal për shqyrtimin e aplikimeve, ndërsa pritet që ky numër të vazhdojë të rritet.
“Paketa e Maleve është një iniciativë transparente dhe përfshin këshillat bashkiakë. Kjo paketë siguron të drejtën e pronës për ata që kanë pronën e regjistruar dhe do të sigurojë gjithashtu mekanizma për të parandaluar abuzimet. Procesi vazhdon dhe disa bashki tashmë kanë një numër të caktuar aplikimesh. Bashkitë që kanë miratuar aplikimet e para janë Shkodra, Vau i Dejës dhe Shijaku, të cilat kanë përfunduar këtë hap të rëndësishëm.”
“Duhet theksuar se ligji është shumë i qartë për rastet kur një individ mund të aplikojë për pronën e tij, për shembull, nëse e ka përdorur atë për më shumë se 10 vjet apo nëse provon me fakte lidhjen që ka me pronën. Nëse gjatë periudhës 45-ditore nuk ka kontestime nga komuniteti ose nga banorët, procesi vazhdon me miratimin nga këshilli bashkiak.”
“Kjo iniciativë lidhet me investimin që individi bën, pasi prona bëhet e tij pas përfundimit të investimit. Megjithatë, ka pasur edhe keqpërdorime për arsye të ndryshme. Kjo është një paketë që duhet të vlerësohet nga qytetarët. Kjo është arsyeja pse ne duhet të dëgjojmë, sepse në Tiranë krijohen spekulime për ndonjë përfitim politik, por në fakt, do të jenë vetë qytetarët dhe rastet e suksesit ato që do të ndryshojnë realitetin në terren.”
“Aktualisht, në Shqipëri, numri i aplikimeve ka kaluar 2000. Të shumta janë filtrat që janë vendosur në nivel vendor, ndërsa numri i aplikimeve pritet të rritet.”
