Gjashtë këmbësorë, përfshirë një oficer policie, u plagosën si pasojë e një aksidenti të rëndë në Culver City, një zonë e Los Angeles, gjatë pasdites së të martës, sipas raporteve të autoriteteve dhe mediave lokale.
Sipas informacionit të policisë, incidenti filloi rreth orës 19:00, pas një telefonate që raportonte një person të dyshuar për vjedhjen e një automjeti dhe për kërcënimin e një tjetër individi me thikë. Hetimet fillestare sugjerojnë se shoferi goditi fillimisht dy këmbësorë me makinë, duke shkaktuar kështu një ndjekje nga autoritetet. Gjatë përpjekjes për të ikur, ai përplasi edhe katër këmbësorë të tjerë.
Autoritetet kanë njoftuar se gjendja e saktë e të plagosurve nuk është ende e qartë, ndërsa disa automjete kanë pësuar dëmtime gjatë ndjekjes. Ngjarja përfundoi kur i dyshuari u përplas me një makinë tjetër afër një restoranti “drive-thru” të McDonald’s, ku më pas ai u arrestua nga policia. Gjatë operacionit, një oficer u plagos gjithashtu.
Policia vendore ka bërë të ditur se arsyet e veprimit të të dyshuarit mbeten të paqarta, dhe e ka cilësuar sjelljen e tij si “të papërgjegjshme dhe të rrezikshme”. “Motivi i tij ende nuk është i qartë, por ai rrezikoi jetën e shumë individëve në qytetin tonë,” tha një përfaqësues i departamentit të policisë.
I dyshuari është dërguar në spital me lëndime të lehta dhe pritet të përballet me akuzat e shumta, përfshirë atë për tentativë vrasjeje. Hetimet vazhdojnë në lidhje me këtë rast.
