Situata e zjarrit që ka shpërthyer afër lumit Shkumbin, pranë fushës së mbetjeve dhe Inceneratorit të Elbasanit, ka shkuar në përkeqësim të ndjeshëm, duke rritur frikën për përhapjen e flakëve.
Sipas raportimeve nga BW, edhe pas ndërhyrjes së ekipeve zjarrfikëse, flakët vazhdojnë të jenë aktive dhe kanë arritur të afroheshin në mënyrë të rrezikshme në zonën e depozitimit të mbetjeve. Aktualisht, konsiderohet se rreziku që fusha e mbetjeve të përfshihet nga zjarri është shumë i lartë, ndërsa ekipet e shpëtimit po punojnë intensivisht për të izoluar vatrat e zjarrit dhe për të frenuar përhapjen e tij.
Për të përballuar situatën emergjente, janë vendosur në gatishmëri sistemet hidrante të Landfillit të Elbasanit, të cilat po shfrytëzohen për furnizimin me ujë dhe për mbështetje në operacionet e shuarjes së flakëve. Megjithatë, kushtet e vështira në terren, me temperaturat e larta dhe erën e lehtë që fryn në zonë, po e komplikon punën e zjarrfikësve.
Autoritetet bëjnë thirrje për kujdes te qytetarët, duke i inkurajuar ata të shmangin lëvizjet pranë zonës së prekur nga zjarri deri sa situata të normalizohet plotësisht.
