Shfaqja “Offline për një Ditë”, premierë e Teatrit “Migjeni” dhe e interpretuar nga fëmijët e Qendrës Kulturore “Kujtim Alija” në Shkodër, është vlerësuar me sukses të jashtëzakonshëm në Festivalin Mbarëkombëtar të Teatrit për Fëmijë “1 mbi 1 dritaret”, duke fituar tre çmime të rëndësishme.
Shfaqja u vlerësua nga një juri e përbërë nga emra të njohur të skenës shqiptare si Yllka Mujo, Ndriçim Xhepa, Luiza Xhuvani dhe Rajmonda Bulku.
Me tekst të Gjovalin Kolaj dhe regji të Drande Xhaj “Mjeshtër i Madh”, shfaqja trajton në mënyrë artistike dhe edukative ndikimin e teknologjisë në jetën e fëmijëve, duke promovuar komunikimin, lojën dhe marrëdhëniet njerëzore përtej ekraneve.
Produksioni u vlerësua me këto çmime:
Çmimi për Tematikën më të Mirë
Çmimi Special “Onufri”
Çmimi për Regjinë më të Mirë
Ky vlerësim konsiderohet një dëshmi e talentit dhe përkushtimit të fëmijëve të Qendrës Kulturore “Kujtim Alija”, si dhe e punës së ekipit artistik që solli në skenë një vepër me vlera të larta edukative dhe shoqërore.
