Një ndërhyrje e suksesshme dhe në kohë rekord është regjistruar nga ekipi i Shërbimit të Urgjencës në zonën e thellë të Vermoshit. Falë një koordinimi efektiv mes strukturave shëndetësore, është bërë i mundur shpëtimi i një të moshuare.
Sipas njoftimit zyrtar nga Spitali Rajonal i Shkodrës, bashkëpunimi i ngushtë mes ekipit të urgjencës territoriale të këtij spitali dhe Qendrës Kombëtare të Urgjencës Mjekësore (QKUM) ka mundësuar transportin e shpejtë me helikopter të një pacienteje 75-vjeçare.
Ndihma mjekësore në kohë rekord
Për shkak të distancës dhe terrenit të vështirë që paraqet zona e Vermoshit, ndërhyrja nga ajri ka qenë vendimtare për t’i siguruar pacientes kujdesin e specializuar mjekësor në kohën e duhur.
“Mirënjohje për të gjithë profesionistët e përfshirë, të cilët me përkushtim dhe gatishmëri ofrojnë kujdes shëndetësor në çdo kohë dhe në çdo skaj të vendit”,- thuhet në reagimin e Spitalit Rajonal Shkodër.
Pacientja është dorëzuar në duart e mjekëve specialistë për trajtim të mëtejshëm, ndërsa operacione të tilla tregojnë rëndësinë e gatishmërisë së urgjencës ajrore në zonat e izoluara malore.
