Në Shkodër janë evidentuar 30 raste të reja me kancer gjiri gjatë këtij viti. Shifra mund të ndryshojë edhe gjatë muajit tetor, kur fushatat ndërgjegjësuese dhe kontrollet mjekësore për këtë sëmundje janë më të shpeshta.
Mjekja onkologe në Spitalin Rajonal të Shkodrës, Ana Xhuveli, thotë se vitet e fundit është vënë re një rritje e ndërgjegjësimit të grave për kryerjen e kontrolleve dhe ekzaminimeve parandaluese.
Megjithatë, sipas saj, ende ka gra, veçanërisht në moshat më të mëdha, që i shmangin kontrollet nga frika, duke bërë që sëmundja të diagnostikohet në faza më të avancuara.
Xhuveli apelon për kontrolle të rregullta dhe shpjegon edhe moshën dhe rastet kur rekomandohet kryerja e mamografisë, duke theksuar se zbulimi i hershëm është një nga faktorët më të rëndësishëm në trajtimin e kancerit të gjirit.
