Një takim mjaft interesant është zhvilluar këto ditë larg vëmendjes publike duke vënë në fokus interesat politike që lidhin opozitën me figura të pakënaqura brenda Partisë Socialiste. Nga burime tepër të besueshme thuhet se dy çështjet që kanë qenë në qendër të bisedimeve, janë e ardhmja e drejtimit të PS-së dhe gara për Bashkinë e Shkodrës.
Takimi i fshehtë në Gjirin e Lalzit është bërë mes kreut të opozitës, Sali Berisha, dhe kryebashkiakut të Shkodrës, Benet Beci, dy miq dhe bashkëpunëtorë të hershëm me njëri – tjetrin, dhe biseda mes tyre është fokusuar në një skenar të mundshëm politik, ku interesat e opozitës dhe pakënaqësitë brenda Partisë Socialiste mund të përputhen.
Sipas informacioneve, takimi është zhvilluar me dijeninë dhe miratimin e Elisa Spiropalit, një prej figurave socialiste që ka shprehur publikisht kritika ndaj drejtimit të partisë nga Edi Rama.
Sipas skenarit që pretendohet se është diskutuar, dy kanë qenë çështjet kryesore të bisedimeve.
E para lidhet me të ardhmen e Partisë Socialiste. Ideja do të ishte që opozita të mbështeste një lëvizje të brendshme politike të udhëhequr nga Elisa Spiropali dhe figura të tjera të pakënaqura me Edi Ramën. Një zhvillim i tillë do të mund të krijonte një front të brendshëm kundërshtues ndaj kryeministrit, në një moment kur opozita kërkon të zgjerojë presionin politik kundër qeverisë.
Në këtë skenar, një grupim brenda PS-së që do të sfidonte drejtimin aktual mund të ndikonte në ekuilibrat e shumicës socialiste.
Çështja e dytë lidhet me Bashkinë e Shkodrës. Një nga elementet e mundshme të një marrëveshjeje do të ishte që Berisha të mos angazhonte një kandidat të fortë përballë Benet Becit në zgjedhjet e ardhshme vendore. Në këtë mënyrë, Beci do të përfitonte nga një garë më pak konkurruese, duke synuar një mandat të dytë në krye të bashkisë.
Një marrëveshje e tillë, nëse do të realizohej, do të ngrinte pikëpyetje serioze mbi mënyrën se si interesat politike kombëtare mund të ndërthuren me konkurrencën elektorale në nivel lokal.
Çfarë do të fitonte Berisha?
Pikëpyetja kryesore në këtë skenar është interesi që do të kishte Partia Demokratike nga një marrëveshje e mundshme me një grupim kundërshtues brenda PS-së.
Për opozitën, përballja me një kryeministër që kontrollon shumicën parlamentare është një sfidë që nuk kufizohet vetëm te protestat dhe aktiviteti parlamentar. Një përçarje e brendshme në kampin socialist mund të ndryshonte raportet politike dhe të krijonte hapësira të reja për opozitën.
Nëse do të krijohej një lëvizje e organizuar brenda PS-së kundër Ramës, ajo mund të ndikonte në debatet e brendshme, në qëndrueshmërinë e shumicës dhe në drejtimin e ardhshëm të partisë. Për PD-në, një zhvillim i tillë do të kishte rëndësi politike, veçanërisht nëse do të shoqërohej me kërkesa për ndryshim të drejtimit qeverisës.
Spiropali dhe e ardhmja e një opozite të majtë
Elisa Spiropali ka shprehur publikisht kritika ndaj zhvillimeve brenda Partisë Socialiste dhe ka artikuluar nevojën për ndryshime në funksionimin e saj. Këto qëndrime kanë ushqyer diskutimet mbi raportet e saj me Edi Ramën dhe të ardhmen e saj politike.
Një skenar i mundshëm, është që një përplasje e thelluar brenda PS-së të çojë në krijimin e një grupimi të veçantë politik, i cili do të synonte të ruante identitetin e majtë, por me një drejtim të ndryshëm nga ai aktual.
Në një situatë të tillë, Spiropali mund të synonte një rol më të rëndësishëm në drejtimin e së majtës shqiptare.
