Një ngjarje e rëndë u shënua natën vonë në Athinë, pas një sulmi të armatosur nga persona të panjohur, që rezultoi në plagosjen e një fëmije të mitur. Katër persona në një makinë iu afruan një kafeneje dhe hapën zjarr mbi të. Gjatë sulmit, një vajzë rreth 10 vjeç u plagos në këmbë. Dyshohet se ajo u plagos nga njw plumb rikoshet
Nga Katia Niakari, IEFEMERIDA
Departamenti i Shantazheve i Drejtorisë për Luftën kundër Krimit të Organizuar ka marrë përsipër hetimin për të shtënat me armë në një kafene në Agios Panteleimonas, mbrëmjen e së premtes, ku u plagos një vajzë 10-vjeçare.
Në qendër të hetimeve ndodhet pronari i biznesit, i cili, sipas informacioneve, është me origjinë shqiptare. Sipas të njëjtave informacione, ai u lirua nga burgu në vitin 2021, pasi kishte qenë i përfshirë në një çështje për një plantacion të paligjshëm, si edhe për tentativë vrasjeje.
Policët po shqyrtojnë një automjet, i cili u gjet i djegur në Aspropyrgos. Sipas informacioneve, brenda tij u gjet një kallashnikov, i cili pritet të ekzaminohet në laboratorët kriminalistikë.
Autoritetet po shqyrtojnë, ndër të tjera, mundësinë që sulmi të lidhet me mosmarrëveshje personale ose të tjera të pronarit. Sipas informacioneve, ai dyshohet se ka një çështje të hapur me një person tjetër me origjinë shqiptare, i cili mbahet në një institucion penitenciar dhe ka tërhequr vëmendjen e autoriteteve për çështje të rënda.
Të shtënat ndodhën pak para mesnatës, kur persona të panjohur hapën zjarr ndaj një kafeterie në rrugën Agorakritou. Katër autorët qëlluan nga brenda një automjeti, duke plagosur një vajzë 10-vjeçare, lehtë në këmbë. Fëmija u transportua në Spitalin e Fëmijëve “Aglaia Kyriakou”.
