Në Gjykatën Kundër Krimit të Organizuar (GJKKO) ka nisur procesi gjyqësor në ngarkim të Pëllumb Gjokës, Behar Bajrit dhe Edmond Prekës, lidhur me vrasjen e Gjin Boriçit në vitin 2020.
Në seancën e parë ka dëshmuar ish-efektivi i Policisë së Vau Dejësit, Fran Gjoka, i cili tha se teksa ishte duke shkuar në komisariat, ndodhi vrasja në orët e para të mëngjesit.
Dëshmia e ish-policit të patrullës në Vau Dejës, Fran Gjoka:
Kam punuar në Policinë e Shtetit. Në gusht 2020 nuk kam pasur detyra të veçanta, kam qenë në patrullë të përgjithshme në Komisariatin e Policisë Vau i Dejës. Kur është vrarë Gjin Boriçi, e mbaj mend si ngjarje.
Rreth orës 05:30–06:00 unë kam qenë duke shkuar në komisariat. Kemi shkuar te vendi i ngjarjes me kolegun tim dhe kemi konstatuar një automjet dhe një person të shtrirë mbrapsht.
Personi ishte 2–3 metra larg mjetit me ngjyrë kafe. Kemi njoftuar grupin hetimor, erdhi dhe dorëzuam shërbimin në orën 06:00 të mëngjesit.
Erdhi patrulla dhe bëri shërbimin ajo. Ne vetëm rrethuam vendin e ngjarjes. Viktima ishte me shpinë, nuk e dallova dot.
Automjeti ishte i fikur dhe i mbyllur, nuk kishte dëmtime, mesa pashë unë. Duhan në vendin e ngjarjes nuk mbaj mend të kem pirë.
