Katër ditë nga dhunimi i drejtorit të AKU-së në Shkodër, ende asnjë gjurmë e autorit, ndonëse ai është filmuar nga kamerat e sigurisë të bizneseve në zonë.
Ngjarja e rëndë ndodhi mbrëmjen e 21 majit në lagjen “Rus”, ku drejtori i AKU Shkodër, Ramir Haderi, u sulmua me sende të forta nga një person i paidentifikuar, teksa po lëvizte në këmbë. Pamjet filmike të siguruara nga kamerat e bizneseve pranë vendngjarjes tregojnë momentin kur autori i zë pritë dhe e godet papritur, për t’u larguar më pas me shpejtësi.
Pavarësisht sekuestrimit të kamerave të sigurisë dhe hetimeve të nisura nga policia, deri më tani nuk është bërë i mundur identifikimi apo kapja e autorit. Burime pranë grupit hetimor bëjnë me dije se një nga pistat kryesore mbetet ajo e sulmit për shkak të detyrës së Haderit në krye të AKU-së në Shkodër.
