Një kultivues kanabisi është dënuar me burg pasi policia zbuloi një plantacion të madh droge të fshehur mbi një lokal fast-food në Maidstone, në Britaninë e Madhe.
38-vjeçari Emiljano Barjamaj, shtetas shqiptar që jetonte në Kingsley Road, u dënua me 12 muaj burg pasi u shpall fajtor për kultivim kanabisi dhe ndërhyrje të paligjshme në rrjetin elektrik për të furnizuar ambientin me energji.
Zbulimi u bë më 1 tetor 2021, kur detektivët që po hetonin shpërndarjen e kanabisit në Maidstone ushtruan kontroll në një pronë në Sandling Road.
Kur policia hyri në apartamentin mbi lokalin, gjeti Barjamajn duke u kujdesur për bimët e kanabisit dhe e arrestoi në vendngjarje.
Hetimet zbuluan se energjia elektrike ishte lidhur në mënyrë të paligjshme për të furnizuar pajisjet e kultivimit pa paguar energjinë.
Një inxhinier konfirmoi se rrjeti elektrik ishte manipuluar për të marrë energji direkt nga linja kryesore.
Bimët e kanabisit dhe të gjitha pajisjet e përdorura për kultivimin u sekuestruan dhe u shkatërruan.
Fillimisht Barjamaj mohoi vjedhjen e energjisë dhe përfshirjen në kultivimin e drogës, por hetuesit arritën të provonin të dyja akuzat.
Pas përfundimit të gjyqit, ai u dënua në Gjykatën e Maidstone më 11 maj 2026.
Detektivja Hayley Chilmaid deklaroi se hetimi ndaloi furnizimin e drogës që në burim dhe pengoi përfitime të tjera të paligjshme.
Ajo shtoi se kultivimi i kanabisit dhe trafiku i drogës vazhdojnë të kenë ndikim negativ në komunitet dhe shpesh lidhen me grupe të organizuara kriminale dhe shfrytëzim të personave të përfshirë.
Policia britanike ka paralajmëruar vazhdimisht se “shtëpitë e barit” me lidhje të paligjshme elektrike përbëjnë rrezik të madh zjarri për shkak të instalimeve të rrezikshme dhe mbingarkesës së rrjetit.
