Aeroporti Malpensa në Itali tashmë mban zyrtarisht emrin “Silvio Berlusconi”, në kujtim të ish-kryeministrit italian dhe themeluesit të Mediaset.
Përurimi i emrit të ri u zhvillua në mëngjesin e së premtes, më 25 shtator, në aeroportin e Vareses, ku morën pjesë familjarë të Berlusconit, bashkë me personalitete të larta politike dhe institucionale.
Marina Berlusconi, vajza e tij, ishte ndër të pranishmit në ceremoni. Ajo shprehu emocionet dhe krenarinë që aeroporti, i cili përditë mirëpret mijëra udhëtarë nga mbarë bota, do të mbajë emrin e të atit. Marina e përshkroi të atin si një njeri që “gjithmonë kërkonte dialogun me të gjithë”.
Fjalën në emër të familjes e mori edhe vëllai i Berlusconit, Paolo Berlusconi, i cili theksoi se aeroporti është një portë drejt Europës dhe botës. Sipas tij, vendimi për të emërtuar aeroportin me emrin e Silvio Berlusconit është mënyra për të ruajtur gjallë kujtimin e tij. “Sot Silvio nuk është më, por është më i gjallë se kurrë”, deklaroi ai, duke veçuar trashëgiminë e Berlusconit në fusha si biznesi, sporti, media dhe politika.
Marta Fascina, ish-partnerja e Berlusconit dhe deputete e Forza Italia-s, reagoi në rrjetet sociale duke shkruar në Instagram se nga ky moment, çdo udhëtar që nis udhëtimin nga aeroporti “Silvio Berlusconi” dhe ngrihet në qiell, do ta ketë pranë ish-kryeministrin. Në postimin e saj, Fascina iu drejtua edhe atyre që kanë qenë kritikë ndaj Berlusconit, duke theksuar se ata do të vazhdojnë të shohin madhështinë e tij.
Pjesë e aktivitetit ishin edhe presidenti i Senatit, Ignazio La Russa, presidenti i Lombardisë, Attilio Fontana, si dhe zëvendëskryeministri Matteo Salvini. Salvini e përshkroi Berlusconin si një nga sipërmarrësit më të mëdhenj në historinë politike italiane, duke deklaruar se ky emërtim nuk është një akt partiak, por një njohje e mirënjohje për rolin e tij.
Megjithatë, ceremonia nuk kaloi pa polemika, pasi mungesa e kryebashkiakut të Milanos, Giuseppe Sala, u vu re dukshëm. Salvini shprehu keqardhje për mungesën e tij, ndërsa vetë Sala sqaroi më pas se kishte kundërshtuar vendimin për ndryshimin e emrit dhe se prania e tij në ceremoni do të ishte në kundërshtim me pozicionin që ai kishte shprehur më herët.
