Gazetari i Euronews Albania, Eni Ferhati, ka sjellë informacione të reja nga seanca e zhvilluar këtë të enjte në GJKKO për çështjen e ish-drejtoreshës së shërbimit informativ shtetëror, Vlora Hyseni. Sipas Ferhatit, Hyseni është vendosur në arrest shtëpie, ndërsa ka theksuar se ajo ka deklaruar që nuk i ka vënë në dispozicion Ergys Agasit materiale me karakter sekret shtetëror.
“U zhvillua verifikimi i kushteve për zbatimin e masës së sigurisë për të tre personat e ekspozuar në këtë procedim penal. Për Vlora Hysenin, ish-drejtoreshën e shërbimit informativ shtetëror, ra masa e pezullimit të ushtrimit të një detyre apo funksioni publik për shkak se ajo është shkarkuar tashmë nga detyra.
Mbeti në fuqi masa e “arrestit në shtëpi”. Zonja Hyseni e ka folur vetë para gjyqtares dhe prokurorëve të SPAK në seancë. Po ashtu edhe avokati i saj Kastriot Selita ka kërkuar një masë më të butë sigurie, por që është refuzuar nga ana e gjykatës.
Nga ana tjetër ajo sipas informacioneve ka deklaruar që nuk i ka dhënë në dispozicion Ergys Agasit materiale të karakterit sekret shtetëror, ndërkohë që bie në kontraditë kjo dhe me deklarimin e saj të premten e kaluar si person në dijeni para se të rendohej pozita e saj penale si person nën hetim dhe vendosje e masës së sigurisë.
Sepse ajo ka ngritur një alibi fillimisht që e ka patur të rekrutuar apo bashkëpunëtor Ergys Agasin, ndërkohë që për dy personat e tjerë është zbuluar edhe se çfarë ë veprimesh konkrete kanë kryer ata në raport me Ergys Agasin.
Ferhati raportoi se, për shefin e laboratorit të policisë shkencore, SPAK dyshon se i ka dërguar Agasit, në kohën kur ky i fundit ishte në arrati, materialet dhe përfundimet që kanë dalë në laborator lidhur me nëntë dokumentet që u sekuestruan në makinën e Agasit në muajin korrik.
Kështu, përpara se SPAK të merrte rezultatet zyrtare nga policia shkencore, Ergys Agasi kishte arritur t’i siguronte ato përmes kontakteve me shefin dhe përgjegjësin e sektorit në Institutin e Policisë Shkencore.
Ndërsa për Embro Sulejmanin, SPAK dyshon se e ka ndihmuar Agasin duke e furnizuar me ushqime gjatë kohës së arratisë së tij. “Kjo ka qenë pak a shumë ajo çfarë ka ndodhur sot në gjykatë me gjithë skandalin në hyrje dhe pompozitetin dhe tentativën për të shantazuar edhe Klodiana Lalën”, tha ai.
