Presidenti i Konferencës Ipeshkvore të Shqipërisë, Imzot Gjergj Meta, ka përcjellë në Vatikan një ftesë për Papën Leoni XIV që të vizitojë Shqipërinë, duke i kërkuar që gjatë një vizite të mundshme të ndalet edhe në Mirditë.
Ftesa është bërë gjatë audiencës private që Papa i akordoi ipeshkvit të Rrëshenit më 19 shtator, në Vatikan. Pas takimit, Imzot Gjergj Meta ka rrëfyer emocionet e këtij takimi dhe bisedën me Atin e Shenjtë.
“Ndjeva shumë dashuri, afërsi nga ana e Atit të Shenjtë”, ka treguar ai, duke ndarë disa nga momentet e takimit.
Sipas Imzot Metës, gjatë bisedës me Papën ai e ka ftuar të vizitojë Shqipërinë, ndërsa ftesën e ka shtrirë edhe për Mirditën, dioqeza që ai drejton.
Takimi në Vatikan zhvillohet pak javë përpara vizitës ad limina apostolorum, gjatë së cilës ipeshkvijtë shqiptarë pritet të shkojnë në Selinë e Shenjtë në fund të tetorit.
Kjo vizitë është një moment i rëndësishëm për hierarkinë katolike shqiptare, pasi ipeshkvijtë do të paraqesin pranë Papës dhe dikastereve të Vatikanit një pasqyrë të situatës së Kishës Katolike në Shqipëri, jetës së besimtarëve dhe sfidave me të cilat ajo përballet.
Në këtë kuadër, takimi i 19 shtatorit ka shërbyer edhe si një mundësi për të përcjellë te Papa Leoni XIV dëshirën që ai të vizitojë Shqipërinë.
Tashmë, ftesa është bërë. Mbetet për t’u parë nëse ajo do të marrë një përgjigje pozitive dhe nëse Papa Leoni XIV do të vizitojë Shqipërinë, me një ndalesë të mundshme edhe në Mirditë.
