Një incident i rëndë ndodhi të premten në mëngjes në një shkollë në Romë, ku një nxënës 13-vjeçar sulmoi mësuesen e tij. Fillimisht, adoleshenti i sprucoi fytyrën me sprej dhe më pas e goditi me thikë, duke shkaktuar plagë.
Të dhënat paraprake tregojnë se i mituri kishte ndërmend të regjistronte momentin e sulmit përmes telefonit të tij dhe madje të hynte live në platformën Telegram. Megjithatë, njëri prej shokëve të klasës ndërhyri në kohë dhe arriti ta ndalonte atë.
Pajisja e nxënësit tashmë është sekuestruar nga policia, për t’u analizuar dhe për të përcaktuar saktësisht rrjedhën e ngjarjeve, si dhe nëse pamjet u ruajtën apo u transmetuan gjatë sulmit.
Pas ngjarjes, nxënësi u shoqërua bashkë me prindërit në komisariat, ku autoritetet po thellojnë hetimet për të zbardhur plotësisht rrethanat e incidentit.
Menjëherë pas rastit, Ministri italian i Arsimit, Giuseppe Valditara, ka kontaktuar drejtoreshën e shkollës, Wanda Giacomini.
