Viktima e një vrasjeje të rëndë të ndodhur në San Giorgio delle Pertiche, Itali, është identifikuar si një 35-vjeçar shqiptar, Ferdinant Hoti. Ai banonte në Mirano, ndërsa trupi i tij u zbulua brenda një automjeti Fiat Bravo të fundosur në lumin Tergola.
Hetuesit arritën të konfirmojnë identitetin e viktimës përmes gjurmëve të gishtërinjve dhe provave të tjera të mbledhura në vendngjarje. Autopsia tregon se 35-vjeçari ishte qëlluar me armë zjarri nga një distancë e afërt, në kohën kur kishte duart e lidhura. Sipas ekspertizës mjeko-ligjore, Hoti kishte humbur jetën para se të hidhej në lumë, pasi në mushkëri nuk u konstatuan shenja uji.
Karabinierët po hetojnë për të rindërtuar lëvizjet e Ferdinant Hotit mbrëmjen e 7 shtatorit. Ata po kontrollojnë pamjet nga kamerat e sigurisë në zonë, për të identifikuar personat me të cilët ai është takuar përpara vrasjes.
Paralelisht, përmes numrit të shasisë së Fiat Bravo-s, është zbuluar se pronari i makinës është një banor i provincës së Venecias. Ky i fundit nuk e kishte deklaruar vjedhjen e automjetit tek autoritetet.
Hetuesit po marrin në pyetje pronarin e mjetit me qëllim sqarimin e rolit të tij në këtë ngjarje.
Fakti që trupi u gjet brenda një thesi të zi, i mbuluar me goma makinash, si dhe fundosja e automjetit në lumë, shtojnë dyshimet se vrasja është kryer me planifikim të kujdesshëm dhe është bërë përpjekje për të zhdukur çdo gjurmë.
