Pas ngjarjes së rëndë të regjistruar një ditë më parë në një strukturë akomoduese në Vlorë, është mbledhur Task Forca Ndërinstitucionale e Sezonit Turistik 2026.
Në fokus të takimit ka qenë rritja e masave të sigurisë në hotele dhe strukturat e tjera akomoduese, si dhe forcimi i bashkëpunimit mes institucioneve për të garantuar reagim të shpejtë në rast emergjencash.
Ministri i Ekonomisë, Kulturës dhe Inovacionit, Blendi Gonxhja, ka theksuar se siguria e pushuesve, qytetarëve dhe punonjësve të sektorit turistik mbetet një prioritet i panegociueshëm.
Në këtë kuadër, është kërkuar intensifikimi i kontrolleve në të gjithë vendin, veçanërisht për respektimin e kushteve teknike dhe masave kundër zjarrit, funksionimin e pajisjeve të sigurisë, daljet e emergjencës, sinjalistikën dhe planet e evakuimit.
Institucionet përgjegjëse janë ngarkuar gjithashtu të rrisin koordinimin në terren dhe shkëmbimin e informacionit, në mënyrë që problematikat e konstatuara të shoqërohen me ndërhyrje dhe masa konkrete.
Një tjetër pikë e diskutimit ka qenë komunikimi i drejtpërdrejtë me operatorët turistikë, me synim rritjen e ndërgjegjësimit dhe përgjegjshmërisë për respektimin e standardeve të sigurisë.
Task Forca ka vlerësuar edhe reagimin e komunitetit të biznesit turistik në Vlorë pas ngjarjes, duke e cilësuar si një shembull solidariteti dhe bashkëpunimi në situata të jashtëzakonshme.
Monitorimi i strukturave akomoduese do të vijojë gjatë gjithë sezonit turistik, me fokus të shtuar në zonat me fluks të lartë vizitorësh dhe masa ndaj subjekteve që nuk përmbushin kërkesat e sigurisë.
“Siguria e pushuesve dhe standardet në strukturat akomoduese janë prioritet absolut”, është mesazhi i ministrit Blendi Gonxhja.
