Ministri i Punëve të Brendshme të Serbisë, Ivica Daçiç, njoftoi se një person i dyshuar për krime lufte ndaj civilëve në Kosovë gjatë vitit 1999 është arrestuar nga autoritetet serbe. I ndaluari është vendosur në paraburgim për një periudhë njëmujore.
Sipas Daçiç-it, i arrestuari është një 47-vjeçar me origjinë nga Kosova, i identifikuar vetëm me inicialet D.M. Arrestimi u krye në pikën kufitare të Batrovcit.
“Ekzistojnë dyshime të bazuara se ai e ka kryer veprën penale kundër popullsisë civile, në dëm të anëtarëve të dy familjeve, gjatë qershorit të vitit 1999, në fshatin Bec, në komunën e Gjakovës”, njoftoi ai.
Daçiç sqaroi se publikoi vetëm inicialet e të dyshuarit. Ndërkohë, të martën, avokati nga Kosova, Arianit Koci, bëri të ditur se autoritetet serbe kanë ndaluar Dugagjin Maxhunin nga Beci i Gjakovës.
Ministri theksoi se D.M. fillimisht u mbajt në ndalim për 48 orë. Dosja penale është dorëzuar në Prokurorinë serbe për Krime Lufte për shqyrtim të mëtejshëm.
“Bazuar në vendimin e gjyqtarit të procedurës paraprake të Gjykatës së Lartë në Beograd – Departamenti për Krime Lufte, atij i është caktuar paraburgimi prej 30 ditësh”, tha Daçiç.
Serbia ka kryer edhe më parë arrestime të qytetarëve shqiptarë të Kosovës nën akuza për krime lufte të kryera gjatë periudhës 1998-1999.
Ky është rasti i dytë i arrestimit këtë muaj nga autoritetet serbe në lidhje me krime lufte të supozuara në Kosovë. Një arrestim tjetër u realizua më 2 gusht në kufirin midis Serbisë dhe Hungarisë.
