Policia ka intensifikuar kontrollet në zonat turistike të Lezhës për respektimin e niveleve të lejuara të zhurmës dhe orareve për aktivitetet me muzikë.
Gjatë një kontrolli të zhvilluar në Shëngjin nga efektivët e Stacionit të Policisë, në bashkëpunim me Forcën e Posaçme Operacionale “Shqiponja”, një lokal është konstatuar në shkelje të normave të lejuara të ndotjes akustike.
Matjet me pajisje të posaçme kanë evidentuar se niveli i zhurmës në subjekt ishte mbi kufirin e përcaktuar me ligj.
Për shkeljen e konstatuar, administratores së lokalit, 37-vjeçares me inicialet E. P., i është vendosur një gjobë prej 200 mijë lekësh të rinj.
Kontrollet janë kryer në kuadër të masave për sezonin turistik dhe pas hartëzimit të zonave me risk për ndotje akustike, si dhe në bazë të ankesave të qytetarëve.
Policia njofton se verifikimet do të vijojnë edhe për respektimin e orarit të lejuar për muzikën në ambientet e hapura, i cili në zonat e banuara është deri në orën 24:00.
Autoritetet u bëjnë thirrje qytetarëve të raportojnë rastet e shkeljeve në numrin 112.
